Gallerí Havarí
Opin bók - P og d - 22. ágúst - 24. október
Opin bók - P og d verk Péturs Más Gunnarssonar og Davíðs Arnar Halldórssonar.
P og d er óvissuferð Péturs Más Gunnarssonar og Davíðs Arnar Halldórssonar um þá undirheima og ormagöng sem einkenna sameiginlegt minni eftir áratuga langa samfylgd. Hvor um sig hefur um langt skeið unnið að myndlist með sínu nefi en kanna nú saman þá þætti sem liggja til grundvallar fagurfræðilegri sýn.
Undanfarið hafa þeir átt endurfundi við gamalt æskuhangs og tekið höndum saman við gerð myndverka. Þar mæta maníukennd, lagskipt, litrík, óræð og fínpússuð smáatriði Davíðs hrárri og hlutbundnari myndgerð Péturs á óvægnum vígvelli samhljómsins. Eftir ævilangt ráf um tví- og þrívíðar lendur lita og forma gera þeir sér nú mat úr þeim víxlverkandi áhrifum sem list þeirra og vinskapur byggir á í þeirri trú að fjórhent spil á vefstól líðandi stundar skili nýjum lærdómi.
Um listamennina
Davíð Örn Halldórsson (f. 1976) er þekktur fyrir afar sérkennilegan og marglaga málarastíl sinn. Hann útskrifaðist frá Listaháskóla Íslands árið 2002 og hefur þróað með sér kraftmikla og tilraunakennda listsköpun þar sem hið áþreifanlega og huglæga mætast. Davíð Örn hefur haldið fjölda einkasýninga á Íslandi og erlendis, þar á meðal í Þulu, Hverfisgalleríi og WB12 í Stuttgart. Verk hans eru í eigu Listasafns Íslands, Listasafns Reykjavíkur og Nýlistasafnsins, og hlaut hann Carnegie-styrkin árið 2014. Davíð starfar bæði í Reykjavík og Stuttgart.
Pétur Már Gunnarsson lauk BA-prófi frá Listaháskóla Íslands árið 2002 og MFA-prófi frá Concordia háskóla í Montréal árið 2015. Hann hefur tekið þátt í fjölda framsækinna samsýninga víða um heim og haldið einkasýningar, meðal annars í Kling og Bang, i8, Open og D sal. Í verkum sínum sækir hann í persónulegt nærumhverfi og vinnur með fjölbreytta miðla – texta, ljósmyndir, gjörninga, teikningar, skúlptúra og tölvuteikningar. Pétur býr í Reykjavík og starfar sem garðyrkjumaður.
