Minningarsjóður Svavars Péturs Eysteinssonar
Minningarsjóður Svavars Péturs var stofnaður með það að leiðarljósi að halda minningu einstaks listamanns á lofti. Svavar Pétur lést úr krabbameini 29. september árið 2022. Svavar Pétur var best þekktur sem tónlistarmaðurinn Prins Póló. Hann var fjölhæfur og framtakssamur tónlistarmaður, myndlistarmaður, hönnuður, matvælaframleiðandi, frumkvöðull og bóndi sem veitti fjölda fólks innblástur með verkum sínum og vinnu, hugmyndauðgi, kjarki og þori.
Markmið sjóðsins er að styðja við listamenn og frumkvöðla sem vinna í sama anda og Svavar Pétur. Opið var fyrir umsóknir 1. - 29. febrúar 2024.
Ægir Sindri Bjarnason, tónlistarmaður, hlaut fyrsta styrkinn úr Minningarsjóði Svavars Péturs Eysteinssonar; 26. apríl 2024 og fékk hann 1.000.000.- kr. í styrk.
Ægir Sindri sótti um styrk fyrir rekstur á tónleikarýminu R6013 við Ingólfsstræti sem hann hefur rekið í nokkur ár og haldið fjölmarga tónleika. Í rökstuðningi stjórnar Minningarsjóðs SPE segir: Verkefnið er frumkvöðlastarf sem er keyrt áfram af miklum drifkrafti, hugsjón og skýrri sýn. Það styður við fjölda listamanna og við grasrót tónlistarstarfs. Verkefnið er jafnframt vel afmarkað og með skýr markmið. Stjórn Minningarsjóðs Svavars Péturs Eysteinssonar styður með stolti við verkefnið þar sem það er í anda Svavars Péturs að stefna saman tónlistarfólki með tónleikahaldi sem er opið öllum tónlistarstefnum sem og kynslóðum.
Næst verður úthlutað úr sjóðnum á afmælisdegi Svavars Péturs, 26. apríl 2025.
Þau sem vilja styðja við sjóðinn er bent á að millifæra á reikning: 0133-26-9936 kt. 650423-2830.
Stjórn sjóðsins hefur unnið ötullega að fjármögnun sjóðsins frá því hann var sopnunar með fjölmörgum verkefnum. Og erum við endalaust þakklát öllum þeim sem hafa lagt fram vinnu í þágu sjóðsins, lagt til fé og / eða tekið þátt í öllum þessum verkefnum.
Í samstarfi við 66°Norður var gerð flíspeysuútgáfa af Haustpeysu Prinsins. Peysan var hönnuð af Svavari Pétri í samstarfi við 66°Norður, og var ágóði af sölu tileinkaður sjóðnum.
Haustpeysa Prins Póló í samstarfi við 66°norður
Stjórn sjóðsins stóð fyrir Hátíð hirðarinnar: Afmælistónleikum Prins Póló, þar sem fjölmargir tónlistarmenn komu fram og gáfu vinnu sína fyrir málstaðinn.
Þá var myndaður Hlaupahópur Hirðarinnar þar sem nokkrir galvaskir hlauparar hlupu og söfnuðu áheitum í Reykjavíkurmaraþoni Íslandsbanka. Hér má sjá aðeins nokkra:
Stjórn sjóðsins skipa:
Berglind Häsler, stjórnarformaður
Elsa Þórey Eysteinsdóttir, framkvæmdastjóri
Benedikt Hermann Hermannsson
Björn Kristjánsson
Guðfinna Mjöll Magnúsdóttir